oleh Marapi Jo Singgalang (komunitas minang) pada 15 Desember 2010 pukul 14:53 ·
Catatan ko di ambiak dari mp3 "PITUAH AYAH UNTUAK ANAK PEREMPUAN" karangan Yus DT.Parpatiah,Pimpinan Balerong Grup Jakarta
Adopun parampuan terbagi kapado limo sipaik,ampek sipaik nan buruak ciek nan elok nan ka dipakai,manolah macam nan limo tu..
Catatan ko di ambiak dari mp3 "PITUAH AYAH UNTUAK ANAK PEREMPUAN" karangan Yus DT.Parpatiah,Pimpinan Balerong Grup Jakarta
Adopun parampuan terbagi kapado limo sipaik,ampek sipaik nan buruak ciek nan elok nan ka dipakai,manolah macam nan limo tu..
- Partamo Parampuan Barau-barau
- Kaduo Parampuan Layang-layang
- Katigo Patampuan Lawah-lawah
- Kaampek parampuan Anai-anai
- Nan kalimo Parampuan Ramo-ramo
Tasabuik parampuan barau2 : Ilia ota mudiak bagunjiang,mangecek asa tangango,rundiang bunyi piluru,galak nyo badaram daram,ado kalo nyo dak tau ujuang jo pangka, urg kanai tak diagak baa muncuang co rapak piuah,baa kulialiak incek mato bajagangan urek lihia nyo,itu tabiat dak tapuji tu nak,jan
Buruak sipaik sumbang kurenah,cilako dek urg parampuan,
Kok dak sopan dipandang urg, Supel,Anggun,keibuan feminim baso kini,bakatolah jo lunak lambuik,banyak kan sengeng dari galak,sabuik sakadar nan paguno. barundiang usah barabuik2, mangecek baganti-ganti, dangankan dulu tutua urang,lah tumbuah baru disiang,tapi kok indak paralu bana,rancak lah diam antok sajo,
sabab dek lidah indak batulang,dek bibia indak bapaga,banyak kecek banyak nan sasek,banyak kato banyak nan lato.
banyak minyak taruah ateh batu.. dapek dikauik dikampuankan.. tapi kalau lah muluik nan taserak bateba dibaok angin indak tapiliah2 lai.bicara itu perak diam itu emas baitu pituah rang pandai
Baa pulo parampuan layang2: lah galik dek buruang layang2 alun tasingik matoari,alun tantu ari ka siang nyo bagageh kalua sarang,layok malayo diudaro, layang malayang ilia mudiak, baradai maliuak liuak, bapacu gadang samo gadang,pueh mambumbuang masuak awan inyo manukiak tajun randah,semba suok lalah kakida alah sanjo baru nyo pulang.
Ikolah lambang jo simbol parampuan nan suko kalua rumah, hobi nyo bahura-hura,salapeh pulang sikola batondan dulu masuak pasa,cangang kian longok kamari caliak iko rabo nan itu tanyo harago ciek2 mambali sauleh haram,asah kan ado karamaian bia ba band atau batandiang konon lo pulo ado konser nyo lah datang labiah dulu,otang2 sanjo katibo bapusu dimuluik simpang mahota bakarikiak-an, mejeng istilah dibetawi,
Padohal dirumah banyak bangkalai,kain kumuah lah abih tarandam,nasi lah patuik dijarangkan,laman samak sarok batabua PR alun bakarajokan,mako tapek baa istilah2 urg,"kalau mau melihat kepribadian seorang gadis lihatlah rumah tangga nya,mau tau kebersihan perempuan lihatlah kamar mandinya"
Parampuan lawah-lawah: kalau layang2 suko malala,mako lawah2 jinak dirumah,satapak indak kalua salangkah haram baranjak,gilo tagak dijanjang pintu, gilo mananti tamu sasek inggok,dibuek sarang bakulindan, aluih bagatah bajirumek,wujuiknyo jaruang bakambangkan,panahan jarek dinan langang,bantuak nyo cando ka mati,malangkah taregek egek,barek tandan sarik bakisa,tapi niat salah pangana sumbang,paham jaek mungkasuik buruak,sia nan lalu sia tapakiak, tiok nan singgah jadi bangkai, disasok darah jo dagiang dicucuik sampai kabanak, lah karabang ditinggakan nyo.
Kok tibo dimanusia tasuo bakeh padusi,itulah gadih pangeretan mato duitan istilah nyo,muluik manih dibuek-buek,ramah tamah bahajan hajan,wujuik nyo cari paratian nak tadayo urg kaawak,barulah ganduah dilalukan,manyalang bakalalarn, cah mambon cah maminjam barutang pantang mambaia,ditagiah urg dimusuahi diburuak kan sabalik kampuang dipitnah dipagunjiangkan aib rasio dicukia2, korban lah urg nan manolong.baitu juo dirumah tanggo kacio rang gaek digaledah,saku suami dipareso kok kunun pacar tunangan nyo lah kariang cari cowok baru.
Parampuan bagala anai2: Sipaik buruak di anai2, mudah tarambao jo rayuan, gilo bagadang ati sajo,alun dijujai nyo lah galak,alun digabik lah manuruik indak dikana mularaik nyo,cubo paratikan elok2 ambiak iktibar jo tuladan,siang tabanam dalam sauang, indak maliek matoari ari lah malam baru kalua, dari jauah nampak cahayo lalu bakaja dakek lampu,bamain basuko-suko,kurang ampia batambah ampia lah dakek baniak inggok, angek taraso bakuliliang manyiga ka batang tubuah,tapi dek jarang maliek cahayo disangko tabuak ka subaliak, kiro nyo api nan tagagai, badan anguih sayok mambaro, tabangkai jatuah kabawah.dek rombongan nan baru tibo, lah nyato maik balampaian marampak mati tabaka, bahondoh juo masuak lampu bamain jo api nan taragang,akia nyo sansaro pulo.
Itulah sipaik sio2 nak,indak mancontoh bakuliliang, sagan baguru dari alam, hati gadang nan baturuik kan, dek sabab karano itu ijan tadayo jo kilek nyo,usua pareso sudah2 baok bapikia dalam2,acok lah bana kajadian nak,lupo diri lupo daratan,sanang nyo sajo nan tabayang,lah kanai baru manyasa sasa nan tidak ado guno,sasuai bak bunyi pantun "kabalai pakan salido mambali ikan jo tanggiri,tali buaian sadio nyo,kironyo gantuangan badan diri" hati2 dalam bagau nak,ingek2 kalau bakawan apolai jo laki2,mancaliak contoh ka nan sudah,liek cilako ka nan kalam,urg pai jalan malenggang,awak tingga maratok nasib,tangguang sandiri akibaik nyo,kalau padusi lah dapek malu,bak payuang tagajai pasak,indak ka kambang-kambang lai kucuik apolah kaguno nyo,malantailah sabalum luluih nak,mamakan dima lah abih,sudah kan dulu baru mulai,itu lah amanah urg tuo ayah manyampai maingek kan
Adopun nan pangabisan iolah parampuan ramo2: IKo lah nan kaditiru,dicontoh ditauladani lambang nak gadih minang kabau,awak elok bulu baminyak,sayok babungo baliak balah,jinak bak raso ka tacakau lia nyo alah hurabi,urg lah mati ngalinggaman,inggok nyo basikua-sikua,tabang nyo bakawan kawan,bakutiko mangko kalua,basamo baru nyo nampak,bamain bukan sumbarang main,tapi bamain kahalai bungo,batandang ka banang sari,dek arif pandai batenggang haluih lunak baok an badan,mangko daun pangarang tak tagoyang,silaro indak nyo gugua tangkai nan mintak di inggoki baitu budi ramo2,
kalau awak gadih babudi nak,bataratik didalm rumah,sopan santun kalau dilua,pandai basegeh jo badandan,kama pai musti batantu,saizin buliah bajalan,jaleh tujuan jo mungkasuik bukan malala dak karuan,bergaul jo nan samo gadang,rapek-i nan tuo2,cari nan panjang pangalaman,dak batukuak tambah ilmu awak,jikok mambali kaparaluan,sasuaikan jo kabutuhan,ukua tanago ekonomi ,sapanjang tubuah bayang2 ,sabab malabiahi ancak2 mangurangi sio2, jauahkan ongeh jo takabua,tansano awak buruang pipik nak,ulek daun kajatah awak buah rumpuik bateh rasaki,jan dicito makanan anggang,sok kato rang kota,pondik kecek rang kampuang,overdosis istilah dokter badan kau juo manangguangkan.
Tarimokasi untuak dunsanak nan alah mambaco catatan ko semoga bisa di ambiak iktibar nyo
Emoticon